Sa dihang si San Pedro mibarog ug misulti niadtong Pentekostes sa Jerusalem, ang iyang mga pulong nakatandog sa mga kasingkasing sa daghang nakadungog kaniya. Nangutana ang mga tawo kaniya ug sa mga apostoles, “Unsay among buhaton?” Subay sa gisugo ni Jesus kanila (Mat 28:19), si San Pedro miingon kanila: “Ang tagsa-tagsa kaninyo kinahanglang maghinulsol, ug magpabunyag sa ngalan ni Jesu-Cristo aron pasayloon ang inyong mga sala, ug madawat ninyo ang gasa sa Dios nga mao ang Espiritu Santo” (Buh 2:37-38).
Unsa man ang Sakramento sa Bunyag?
Ang Bunyag sakramento sa Pagtoo nga:
· naghatag og bag-ong kinabuhi diha ni Cristo (1 Pedro 1:3f) ug nagpasaylo sa mga sala pinaagi sa tubig ug sa Espiritu,
· naghimo kanatong sakop sa Simbahan (1 Cor 12:12f) , ug
· mga sinagop nga anak sa Amahan (cf. 1 Jn 3:1) pinaagi sa pag-ambit sa diosnong kinabuhi
[Daghan ang moingon nga ang simbahan mao lamang ang lugar diin ang tawo gibunyagan. Apan klaro dinhi nga ang pulong Simbahan nagpasabot dili lamang sa physical building kondili sa mga tawong binunyagan nga naglangkob sa Cristohanong katilingban. Ang Simbahan mao ang Binunyagang Katawhan. Ang mga binunyagan mga disipulo ni Cristo nga nakaambit sa Iyang misyon sa pagka-pari, pagka-propeta, ug pagka-hari.]
Nganong gitawag man ang bunyag nga sakramento sa pagtoo?
Tungod kay sa pagpangayo nato sa bunyag, atong gipangayo sa Simbahan sa Dios ang gasa sa Pagtoo.
Gikinahanglan ba gyud ang Bunyag alang sa kaluwasan?
Si Kristo, ang bugtong Magpapataliwala ug Dalan sa kaluwasan, nagpadayag gayod nga gikinahanglan ang pagtoo ug bunyag (Juan 3:5; Marcos 16:16). Apan tungod kay ang Dios buot man nga ang tanan maluwas (1 Tim 2:4), ang grasya nga gikinahanglan alang sa kaluwasan gitanyag ngadto sa tanan.
“Tungod kay si Cristo namatay alang sa tanan,… kinahanglang atong huptan nga ang Espiritu Santo nagtanyag ngadto sa tanan (sa paagi nga ang Dios lamang ang nasayod) sa posibilidad sa pagkahimong kabahin sa Misteryo Paskual (Paschal Mistery) ni Cristo” (Gaudium et Spes, 22).
Unsay ipasabot sa silyo sa bunyag (“Baptismal Seal” or “Character”)?
Ang tulo ka sakramento (Bunyag, Kompirma, ug Orden sa Pagkapari) nagmarka og usa ka dili mapapas nga espirituhanong selyo o “character” diha sa kalag (2 Cor 1:22; Efeso 4:30; Gipadayag 7:3), nagpatik sa klaro nga kalambigitan ngadto ni Cristo ug ngadto sa Simbahan.
Nganong bunyagan ang bata (infant)?
Ang mga bata gibunyagan diha sa “pagtoo sa Simbahan” o sa mas kongkreto nga pagkasulti, sila gibunyagan diha sa pagtoo sa mga ginikanan ug sa mga maninoy ug maninay.
Ang pagbunyag sa kabataan nagpakita sa kamatuoran nga ang bunyag:
· usa ka libre nga gasa (free gift) sa Dios, dili atong hinago-an;
· mao ang sinugdanan sa atong kinabuhi diha sa pagtoo (faith-life);
· usa ka gasa nga gihatag pinaagi sa matuohong kinabuhi sa mga ginikanan.
Unsa man ang Sakramento sa Pagkompirma?
Ang Pagkompirma mao ang sakramento diin, pinaagi sa gahom sa Espiritu Santo, ang tawong binunyagan gidala ngadto sa mas suod nga pakighiusa uban sa Simbahan ug gihatagan sa kusog sa aktibo nga pagsangyaw sa Ebanghelyo.
Unsay gigikanan sa sakramento sa Pagkompirma?
Sa sinugdan ang pagkompirma kabahin sa gipalapdan nga rito sa Bunyag. Apan sa dihang nagkadako ang Simbahan, ang gasa sa Espiritu Santo pinaagi sa “pagpandong sa kamot” nga nagpadayon sa grasya sa Pentekostes diha sa Simbahan, kining maong sakramento gilain na sa Bunyag.
Unsa ang mga epekto sa sakramento sa Pagkompirma?
Kini naglig-on ug nagdason sa grasya sa Bunyag, sa misyon sa paghimog katilingbanong pagsaksi (public witness) ngadto ni Cristo ug sa Simbahan.
Unsaon pagpili og mga maninoy ug maninay sa Bunyag ug Pagkompirma?
Ang mga maninoy ug maninay kinahanglang:
· * anaa na sa hustong kahingkod sa pagkatawo;
· * maayo (good-living) nga Katoliko nga nakadawat na sa sakramento sa Pagkompirma;
· * adunay kapasidad ug sinsero nga intensyon sa pagtabang sa bag-ong nabunyagan o nakompirmahan sa matinud-anong pagpuyo sa mga katungdanan sa Kristohanong Kinabuhi.
